燈膽權致辭時講完一輪無毒校園訊息之後，失驚無神大嗌三聲「抗毒！抗毒！抗毒！」仲要全場學生陪佢叫埋一份。 只見抗毒中嘅燈膽權目露燈光，右手出拳，振臂高呼，渾然忘我，將不可一不可再嘅堅毅精神發揮得淋漓盡致。不過可能極小撮家庭觀眾喺接收電視訊息嘅時候出現 干擾現象，又或者個別電台聽眾幻聽，有網民報料話聽見燈膽權大叫三聲「港獨！港獨！港獨！」亦有人話聽到「抗共！抗共！抗共！」

成功將悲憤化為力量

作死咩！燈膽權家陣個膽仲細過納米燈 膽，搞政制改革唔敢違抗中央半句，搞慳電膽被記者問多兩問就扮聾封嘴，搞生日會仲縮沙唔夠膽赴約，試問又點會夠膽嗌港獨或抗共？睇得出，燈膽權已經成功將 悲憤轉化為力量。從佢喺大埔校園緊握拳頭一剎那起，燈膽權已經將自己打造成一個百毒不侵嘅無毒丈夫。就算網民改編多十幾廿首《電燈膽》，燈膽權都只會當係 生日歌咁聽。